Firefox

如果唔係個IE唔生性，都唔會下定決心試用其他browsers，我試過兩個，最後都係用firefox。原來好多人都轉用了firefox，要多謝ddd出手，離岸幫我攪掂個看似簡單，但我又唔識攪嘅難題。其實，做電腦的programming係咪有種創造feel可以帶來滿足感？如果technical support都有滿足感的話，那是不是來自problem solving？

我諗好多人同我一樣，一上網就用IE，雖不至於有感情，但用落就有了安全感（不管佢其實係幾唔安全），不想試新野。不過，呢個世代唔多講忠誠，就其商品的選擇上，那裡有好野有平野，即轉唔貶眼。而且，好多野係需要忍兼不能改變，但也呢個世界仲有好多野係可以選擇的。在可以選擇與不可選擇的事情上有了清晰的界線，消費主義式的轉換product又何妨？我不是，也不需justify自己轉用browser，而是想到今日教會的消費主義。轉教會，甚至經常都在搵教會的信徒便屬於視教會為消費產品一樣，呢間教會像microsoft，那間是dell，這間是oracle...隨時轉。有啲野，還是無得揀好...

用左幾日firefox都覺得佢又快又方便。只係上blogger煩啲，每次係word copy啲文，publish之時都出現問題，就係html裡面多左啲code，每次都要返去IE upload啲文章。還要繼續適應...

普洱茶磚

這兩日要找一些關於文革歷史的資料, 上Amazon睇下有無最新出版物之際, 竟然發現有普洱茶賣! 它的特色就是好味, 健康, 減磅! 但標題卻是: 1973 Cultural Revolution Brick of Tea Leaves - Vintage Pu-erh Teas, 即係話, 文革期間生產的才是賣點.

但我估佢應該加上, 年代越久越珍貴好啲, 否則主要為英語用家的Amazon客戶,又點敢買三十幾年嘅茶葉飲用? 係囉, 擺左6年都未賣出, 有無人有興趣?

多謝盛惠$1,100美元, 8.5安士.

佢又玩咩呀?

無意中發現隻貓影左亞針呢張相...到底七歲半係咪仲應該玩緊六歲以前啲玩意呢？

話說我哋習慣洗衣及乾衣後，兩姊妹各自負責收拾好自己啲衣物，通常亞針最熱心，連個籃都攞埋過去自己房，整理好後再攞返過黎。呢日照常營業，但佢攞左個籃過去就無返過黎，原來，佢係裡面睇晒成本書！

不過，正面一點，攞個籃咁坐，其實都無咩問題啫，只係...係呢度生活，又真係好悶。無車不能出門，因此，凡事都要家長陪同，這本應是很好的，相反，就好似係度浪費光陰咁。亞妹還可以自得其樂，咩都玩得餐，只是有點擔心家姐，佢形容呢度係傷痛回憶：無朋友，無樂趣，但有的是時間...

Its been a hard day's night

這兩星期常想起Beatles一首歌, Its been a hard day's night。我沒有sleeping like a log 的能耐, 只有 working like a dog的本事。

想起過去兩日在教會的分享，雖然時間愴促，但預備的過程是挻享受的，而帶workshop及講道期間也許說話太集中及太用力，之後就好似失去靈魂的軀殼一樣，沒精神、沒反應。差點目光呆滯，甚至雙眼反白...

唉...年紀大，開始唔挨得tim...

死而復生

今日小組在這裡聚會, 順便睇睇部機, 果然係電腦人, 死而復生, 不單止攪掂晒所有輸入法問題, 仲順便清清"腸胃", 下個禮拜加多2G Ram, 咁就一天都光晒, 感謝主!!

收工又開工

要交的文及assignment都已send出去，始終無咩安全感，send出去啫，有可能收唔到，又有可能　"話"收唔到。暫時放低唔理佢，趕埋聽日個workshop，後日講道，同埋手上RA工作，format埋部機，之後再諗下一篇文！

呢個禮拜主要係精神不振，原來我每日高度集中啲時間唔可以太長，到夜晚個腦實晒唔係好function到。日日對住英文版四書、朱熹、王陽明，好佩成百年前出國留學啲儒家學者，用英語同西仲講儒學，又有啲宣教士後來成為學者，把中國古文翻為英語比外國人讀......

琴晚做完晒嘢就收到同事通知，戴紹曾牧師返天家，又一老前輩離開，佢的確係一代偉人，成個家族都咁愛中國，比中國人更愛中國，我哋呢啲後輩，拍馬都追唔上。佢啲國語標準過我就唔使講，可能連中國古文都好過我...

緊張每一天

部機又有輸入法問題，今次輸入中文完全無問題，只係打唔到英文，而MSN情況剛好相反，打唔到中文。

有咩問題？咪所有要密碼的都入唔到！完全廢晒武功。最嚴重係，仲趕緊功課...。

唔想講咁多，過埋呢幾日同佢做大手術，暫時用住另一部機，但好多檔案，setup要再整個。

食死人的葯

我不是說這種葯會食死人，只是食了後像個死人。
這兩天有點感冒跡象，於是食了本地的Tylenol。食之前已講明會眼訓，但據我過往多年食眼訓葯的經驗應該可以頂得下，無咩大問題，點知食葯後的反應是：目光呆滯，思想遲緩。Okay，咁咪去訓囉。

諗住訓一陣，連電腦都無閂。點知由下晝唔知幾多點訓到食晚飯，晚飯後還好，話閂機休息都係咁Ｅ睇左三本書。再食一次Tylenol就訓左九個鐘，起身兩個鐘後又訓過，下午接女放學後又訓過...成個活死人咁。

唔單止訓，食之無味也無所謂，直情係食之變味：啲菜係甜嘅，啲細路話好食；啲肉係咸嘅，平時食好淡嘅猫話Okay喎！再加埋食緊醫生弟兄供應嘅消炎葯啲副作用：些微胃痛，些微作嘔，些微胃仔與肚脹，每樣隨量都唔嘢少。

過程與結果

隔離窗，即我另一個主要為靈修查經的網誌，轉眼間已上載了450篇信息，在我離美之前應可增加多最少600篇。1000篇的經文默想或查經，可以為這一站的人生旅程留個記念。是的，來美之後才可每日抽出1-2小時讀經默想，以級利用神學院資源，借解經書作參考。

這習慣，除了因為不用四處奔走，每日安安靜靜在家工作及讀書外，還是老教授Robert Clinton的鼓勵。他過去四十年多年，用了四十本聖經，每本都邊讀邊寫筆記，近十年轉用電腦及網上版本的，於是一個個讀經心得的檔案又成為學生們隨時的幫助。他要求學生寫上代禱事項，他早上為學生禱告，神感動他，他便找出曾經寫過的分享email比同學，我也收過。老實說，最感動的不是那篇分享（我還記得內容，並有實踐），而是那份情。至少，上他課的三個月那段時間，有這份情。雖然，我的論文方向跟他的研究很不同，我還批評他的主張，但作為老師，他是典範，也許這就是他所教導理論以外的精彩之處。

再次印證，being比doing所產生的impact大。我們怎樣個一件事，比我們做了甚麼事還重要。所以，寫這些靈修筆記，也是過程比結果重要。

讀到這裡，想起今日的美國

以賽亞書第五章的預言並不是針對今日的美國，但肯定是人類歷史上共有的罪惡問題。我早前寫了《罪惡之城？》，也許我今日若處身別一個國家或城市都會有類似感受。

返轉頭提醒自己，若我今日只有眼前自己的事而活，終有一日會跟世俗同流而不自知。

另外，我已經停用那隻消炎葯了，食左剛剛三日，個胃開始有點不適，醫生弟兄話除左痛之外，有脹、有胃氣、有不正常的肚餓感覺都要停。我中左頭兩樣，唔好搏，趕緊文仲要攪到胃出血就天大痳煩。

都係要感恩，有個除時用blackberry答你問題既醫生，係邊度搵！

重量級消炎葯

自去年十二月回來身上有兩處不舒服。之前提過骨膜炎，週日在教會面對面遇到醫生弟兄，諗住係咁易問下佢有無咩葯可以食，佢唔識中文骨膜炎係咩！於是便係教會間影印房門口問症，跟住佢講左幾隻消炎葯叫我買，仲話要重份量啲，除非胃有事，否則要食七日。

昨日本來都諗住去買葯，剛好看其中一隻有特價。買回來細看，醫生弟兄果然無錯，呢隻葯係會食到胃出血，所以一定要食飽飽先食得，一日三餐搵佢送飯就包無問題。同埋跟據標籤指示，一日最多食六粒，除非有醫生指示。咁，我都算係有醫生指示，一日要食九粒！

本來都唔係好想理佢，原因係第二處的唔舒服嚴重到一個地步讓我忘記心口痛－－身痕。攪左一輪，知道應該係乾燥所至，從來都無呢輪咁嚴重，成個孫悟空咁，週身痕到連痛都唔覺。

放縱...一次咁多啦

昨晚終於寫完first draft，可以停一停，做吓其他野。雖然仲有排改，但至少完成一個里程....漫漫

為左慶祝吓，我一次過食左半桶Ben & Jerry，你見過Ben & Jerry就知有幾＂大＂桶，好少事啫。

長路...今日開始要面對王陽明啦....

至陰至寒

過去我是怕熱不怕冷，今時間日，啲細路著住t-shirt，我就大褸一件。可能全屋最凍係我呢個位置，所以朝早開工會覺得好凍。

有幾日看到外面有成攝氏廿多度，華氏七十幾，我仲覺得好凍，又褸又冷衫。經檢討後，發現唔係因為呢個位至陰至寒，而係我靜止太長時間！我真係好需要好需要運動，如果唔係，就三十度都著大褸，真係就快死！

不過，呢幾日又雨又凍，遲啲再講...

咖啡水

係咪我近來飲大左呢？差不多粉，差不多水，蒸出o黎嘅咖啡好淡喎。仲有人話我落好多粉喎，點解呢？

按道理，我唔係飲好多啫，用呢度容量來計算，我只係一朝飲4cups,一個禮拜飲五日，好多咩？

其實我飲咖啡只係想係朝早飲啲有味嘅熱飲，同提唔提神完全無關，有一次好攰，早上送完女返學飲一杯咖啡後一樣可以訓翻兩個鐘。不過，我真係想享受呢度咖啡文化，有無啲好選擇或者較好的做法？

終於on track

意思係，終於可以全速進發寫文。原來完整的tutorial paper比想像中難，就算十二月初唔返香港，兩個禮拜都未必夠時間原成，因為沒有經驗，在整個學期讀書時沒有明確的論文Ｆ，到寫的時候要重新聚焦同構思，基本上同重新睇過晒啲書無咩分別。

我比自己的安慰是，第一個tutorial是分上下兩parts，交唔同野，簡單好多，第二個算係真正的doctorial tutorial，當吸收經驗，而且內容並不是我最熟識的，以前係神學院基本上沒有接觸過leadership theories，睇得幾多書都無助，因為無經過學術思考的過程。期望以後的Ｔ會暢（順）快（手）啲。

我估計仲要寫多一星期先完成first draft。手頭上仲有其他書要睇同文要寫....繼續仰望恩典。

另外，唔知係咪成日對住部腦，有啲悶，學人食零食，有一日下晝裝左四個球嘅雪糕，全部係唔同味嘅Ben & Jerry，無法啦特價，用香港三份一至一半價錢買到，還加幾塊chips...食食下，我問自己：做咩滿口垃圾？

不過，我會繼續食，直到體重上升......就食少啲囉！

另一種生理時鐘

每日到了黃婚便開始背痛，晚上胸痛多左啲啲，好似裝左個鬧鐘咁，到時到候便要停工。

醫生朋友話懷疑係骨膜炎，除左食消炎葯同做物理治療外，無咩好做。不過，呢位醫生朋友係十二月在港見面時傾開，佢雖然係骨科，但無正式睇過我喎。仲話要點點點照過先知係咩事，我當時第二日就上機，那有時間照！再加上，次次問佢，各類痛症，佢都話：無咩嘢啦，係咁架啦，除左點點點之外，都無咩好做...

返到美國就更加唔使睇，醫療保險係比啲保險公司CEO花嘅，睇醫生，想破產咩！

希望捱到六月啦...

中國短訊

據說今年春節中國內地發了180億條短訊，以大除夕發的最有意思，這是從報章抄下來的：

「難忘2008：
過大年雪災了，
炒牛市崩盤了，
留個影艷照了，
去旅遊暴亂了，
乘飛機罷航了，
坐火車出軌了，
待在家地震了，
去打工被裁了，
喝牛奶結石了，
這一年太難了，
還有一夜就過完了！」

一年大事咩都比佢講晒!

其實，多年來在大陸跑，看到他們的標語，不時都覺得他們很具創意，特別在說時事及政治話仍很感敏的年代，精緻的順口流更是精彩。如今社會開放了，民眾的創意更釋放了，不禁要為中國人的智慧喝彩！

老婆玩野食

佢呢期有個好有建設性的興趣...

先有一輪自家製义燒, 後再上燒排骨... 唔知幾時有燒鵝同乳豬呢?

早一輪有cup cake, 但我無機會試, 呢輪有cheese cake, 相信好快就會有唔使用麵包機嘅麵包, 唔知幾時會有Pie & Tart水平嘅egg tart同雞批呢?話唔定會有pizza喎!

佢近來真係進步唔少, 未整過嘅奶油津白都係咁易就攪到似模似樣, 真係要讚吓佢先得!

唔.... 我今年新年終於夠膽提出新願望啦...都係唔講, 費事見光死, 哈哈, 流口水tim...

一天的難處一天當就夠了

呢輪好多嘢忙，要預備的甚麼甚麼，都只能餐搵餐清，即是說，只能為明天的需要預備，好stressful。

請為我禱告，09年一開始便不容易，我期望：
1. 背痛消失
2. 工作快速完成
3. 學期論文做得快又有質素
4. 每次講道, 教主日學, 講talks都能成為主的流通管子
5. 今日就希望完成三大工作!!

唔講咁多，禱告唔怕貪心，還要多求恩典，所寫的所講的要能造就別人就好了。

開工！

有感山火

加州每日都有數千次地震，但有感地震則不是時間有。

這一年叫大型的山火都不只一次，上次先講緊係百年一遇的大火。也許跟我們所住的地區有點距離，唔算有感山火。呢幾日就好唔同。

昨晚大女訓訓吓話聞到煙味，我哋打開個窗都聞到，但無諗過咩事。今日出門就發現天色唔係好好，灰灰黃黃，仲聞到燶味。

返到教會，有弟兄姊妹話呢次山火燒到好近，有些人仲要離開家園，要逃亡。真係好近喎！

Google地圖真利害，連山火locations也清楚標出路。 圖中紅圈就是我們的家，你會發現山火都是圍住green的山林，我們所住的並不是豪宅區，所以，都無直接影響。 由我們家開車到災區，如果唔塞車，20分鐘到就可以到。都唔係太遠。

想想在這裡生活的心情：近來已受栽員減薪的影響，一般打工仔對未來沒有太大信心；州政府無錢，救災的錢從何來？記念這裡的居民，其實真係人心惶惶。