超大、超甜、超平......

呢輪聽到都係股市、油價、生活指數等的上上落落。今日新聞仲話深圳有人因為物價太貴而輕生。

其實，我地一年四季，不論市場環境如何都要慳住洗，慢慢摸熟門路，有時會有意外驚喜。

好似新居附近有間market，我地接女放學前走去打個白鴿轉，竟然比我地有如發現金礦般的興奮。話說從前我地聽聞加州陽光正，呢度啲橙係世界一絕，點知接二連三的失望後，已不敢再買橙食。

點知......

呢間market有三巨箱橙放做特價，如用港幣計，應是八到九毫一磅。一磅有多少？呢批貨係每個一磅（同我手掌咁大），係香港，呢隻橙起碼賣5-6倍價錢。超大、超甜、超平，唔怪得嗰日見到個個（主要係華人）都好似去搶咁買橙。

呢個禮拜，晚晚一家大小的活動－－食橙！

人其實係好容易滿足！